Personvern for lesarkontoar

Kven som er ansvarleg

Alfa prøveavis. Spørsmål om personvern sender du til post+alfa@idgo.no.

Kontoen

Du loggar inn med idgo. Frå idgo får vi eit fast brukar-ID, og det lagrar vi saman med når kontoen blei oppretta og når du sist logga inn. Namnet og profilbildet ditt frå idgo står i innloggingsøkta, så sida kan vise kven som er logga inn. Vi lagrar namnet når du skriv ein kommentar eller eit spørsmål i eit nettmøte. Profilbildet blir lagra når du skriv ein kommentar. E-postadressa di lagrar vi ikkje.

Grunnlaget er avtalen om kontoen du opprettar (personvernforordninga artikkel 6 nr. 1 bokstav b).

Profilen, med samtykket «Lesarstatistikk»

Fødselsår, kjønn, postnummer og kommunen postnummeret høyrer til. Om du vil, også inntekta i husstanden, kor mange som bur i husstanden, yrke eller bransje og utdanning. Alle felta er frivillige.

Alfa prøveavis brukar opplysningane berre i samla statistikk over lesarane, i grupper på minst 10, og ser aldri svara dine enkeltvis. Grunnlaget er samtykket ditt (artikkel 6 nr. 1 bokstav a).

Lesinga di, med samtykket «Lesinga di»

Sakene du les, blir knytte til eit kodenamn for kontoen, ikkje til namnet ditt. Slik ser avisa kva aldersgrupper og kommunar som les kva. Grunnlaget er samtykket ditt.

Måling på nettsidene, med samtykke i banneret

Når du godtek måling i banneret på nettsidene til avisa, lagrar vi kva sider og saker du opnar, kva kort på framsider og seksjonssider som var synlege for deg og kva du klikka på, kor lenge du les aktivt, kor langt du blar, om du les saka ut, kva nettstad du kom frå og går vidare til frå lenkjer i avisa (berre namnet på nettstaden, aldri adressa), og om du bruker mobil, nettbrett eller PC. Vi måler også kva videoar du ser på avisa, om du startar dei sjølv, kor lenge du ser og kor langt du kjem. Nettlesaren får eit tilfeldig kodenamn i lokal lagring. Kommunen blir rekna ut frå IP-adressa, og IP-adressa blir ikkje lagra.

Utan samtykket «Lesinga di» blir målinga ikkje kopla til kontoen. Alfa prøveavis ser berre samla tal for grupper på minst 10 lesarar. Hendingane blir sletta etter 13 månader. Avslår du seinare under «Personvern og måling» nedst på sida, slettar vi det som er målt frå nettlesaren. Grunnlaget er samtykket ditt (ekomloven § 3-15 og artikkel 6 nr. 1 bokstav a).

Posisjon, berre når du ber om det

Når du trykkjer «Bruk posisjonen min», gir nettlesaren posisjonen éin gong. Vi rundar han av til om lag 100 meter og spør Kartverket kva kommune punktet ligg i. Kartverket får berre punktet, ikkje kven du er. Vi lagrar kommunen og datoen, aldri punktet, og aldri meir enn éin posisjon.

Tema du følgjer

Når du trykkjer «Følg» på eit tema, lagrar vi kva tema du følgjer og når du byrja å følgje det, så For deg kan vise deg sakene derifrå. Ingen andre ser kva du følgjer. Grunnlaget er avtalen om kontoen (artikkel 6 nr. 1 bokstav b).

Følgjene står til du trykkjer på «Følgjer» for å slutte, eller slettar kontoen.

Kommentarar du skriv

Når du skriv ein kommentar under ei sak, lagrar vi teksten, når du skreiv og endra han, og namnet og profilbildet ditt frå idgo slik dei var då. Namnet, bildet og teksten står opne under saka for alle som les ho. Vi lagrar òg kva kommentarar du likar og rapporterer. Andre ser berre kor mange som likar ein kommentar, og ingen ser kven som har rapportert.

Redaksjonen i Alfa prøveavis kan skjule og slette kommentarar og stengje deg ute frå kommentarfelta. Då lagrar vi kven i redaksjonen som gjorde det og når, saman med namnet ditt. Grunnlaget er avtalen om kontoen (artikkel 6 nr. 1 bokstav b).

Kommentaren står til du eller redaksjonen slettar han, saka blir sletta eller du slettar kontoen. Har kommentaren svar, står berre merket om at han er sletta att, utan namn, bilde og tekst. Slettar du kontoen, går kommentarane, likane, rapportane og modereringa som gjeld deg, med.

Spela, og topplista med samtykket «Topplista i spela»

Når du spelar innlogga, lagrar vi resultatet ditt per spel og dag (poeng og når du fullførte), saman med namnet ditt frå idgo slik det var då. Resultata står på Min profil, der berre du ser dei, og gir prestasjonar og dagar på rad. Grunnlaget er avtalen om kontoen (artikkel 6 nr. 1 bokstav b).

Med samtykket «Topplista i spela» står namnet og poenga dine på topplista som andre lesarar i avisa ser. Trekkjer du samtykket, forsvinn du frå topplista med ein gong. Grunnlaget er samtykket ditt (artikkel 6 nr. 1 bokstav a).

Du kan slette spelhistorikken sjølv på Min profil. Slettar du kontoen, går resultata med.

Gallupar du røystar i

Når du røystar, lagrar vi kva gallup og revisjon du røysta i, svaralternativa, tidspunktet og koplinga til lesarkontoen. Det hindrar at same røysta blir tald fleire gonger, og handhevar røystefrekvensen gallupen bruker. Andre lesarar ser berre oppteljinga når redaksjonen har valt å vise resultat. Grunnlaget er avtalen om kontoen.

Røysta går med i nedlastinga di og blir sletta når du slettar lesarkontoen. Prøverøyster blir haldne skilde frå den offentlege oppteljinga.

Spørsmål i nettmøte

Når du sender eit spørsmål, lagrar vi teksten, namnet frå innlogginga, tidspunktet og koplinga til lesarkontoen. Rettingar, godkjenningar og tilbaketrekkingar får eigne revisjonar. Berre godkjende spørsmål med namn og godkjende svar blir viste til andre lesarar. Grunnlaget er avtalen om kontoen.

Du kan rette og trekkje tilbake eigne spørsmål. Tilbaketrekking skjuler innlegget for andre lesarar; redaksjonen har framleis historikken. Nedlastinga di inneheld også revisjonane. Slettar du kontoen, fjernar vi koplinga til kontoen, namnet og spørsmålsteksten frå både innlegget og historikken.

Avisappen

Du treng ikkje konto for å lese opne saker i appen. Saker du lagrar, og den siste framsida appen henta, blir lagra berre på telefonen, så du kan lese utan nett. Du fjernar dei under Lagra, eller ved å slette appen. Appen bruker ingen sporing eller reklame-ID og sender ingen opplysningar om lesinga di til andre.

Når du slår på varsel, lagrar avisa ein tilfeldig ID for telefonen, kva varsel du vil ha (kategoriar, viktige nyheiter, stilletid og kor mange per dag) og om telefonen har gitt løyve. Varsla du har fått, står i varsellista i 30 dagar. Du kan slå av varsel eller slette alle opplysningane om telefonen under Varslar. Har telefonen ikkje vore i bruk med appen på 12 månader, slettar avisa opplysningane.

Annonsar i Marknad

Når du sender inn ein annonse, lagrar vi namnet, e-postadressa, telefonnummeret og adressa du skriv, teksten og bilda i annonsen. Bilda blir lagra utan EXIF-data og posisjon. Vi bruker opplysningane til å publisere annonsen og til å nå deg om han. Grunnlaget er avtalen om annonsen (artikkel 6 nr. 1 bokstav b).

Annonsen står til du eller redaksjonen slettar han, eller du slettar kontoen. Varsel vi har sendt deg om annonsen, blir sletta 90 dagar etter sending, og eit utkast du ikkje sender inn, etter sju dagar.

Kapselen

Kontosidene set éin kapsel, «lesar», når du loggar inn. Han held deg innlogga i 30 dagar etter sist du var innom, og blir ikkje brukt til noko anna. Utan innlogging set kontosidene ingen kapsel.

Kven som får opplysningane

Alfa prøveavis sel ikkje opplysningane og deler dei ikkje med annonsørar. Leverandøren som driv publiseringsløysinga, lagrar dei på vegner av avisa som databehandlar. idgo står for innlogginga, og Kartverket får posisjonspunktet når du ber om det. Vi sender ingen e-post frå kontoen.

Kor lenge vi lagrar

Profilen og lesinga står til du endrar dei, trekkjer samtykket eller slettar kontoen. Trekkjer du eit samtykke, slettar vi opplysningane som høyrer til det. Ein konto som ikkje har vore i bruk på 24 månader, blir sletta med alt som høyrer til.

Rettane dine

På kontosida ser du alt vi har lagra om deg. Der kan du rette profilen, laste ned dataa, trekkje kvart samtykke og slette kontoen. Du må vere minst 13 år for å dele profilen.

Har du spørsmål, skriv til post+alfa@idgo.no. Meiner du at vi bryt reglane, kan du klage til Datatilsynet.